曼聯立立亂華倫有雞偷

发布时间:[2018/10/2 23:25:06] 来源:体城网

歐聯分組賽H組曼聯主場迎戰華倫西亞。紅魔近期走勢明顯下滑,加上場外負面新聞不斷,搞到領隊莫連奴帥位危危乎,加上球隊以往主場對親西甲球隊優勢都唔明顯,呢場隨時畀華倫偷到雞,讓球客勝博得過。

(Now 643、有線602及662台周三凌晨3時直播)

執掌曼聯教鞭第3季嘅領隊莫連奴,今季聯賽開局曳爆程度,足以同當年莫耶斯接替費格遜後首賽季嘅慘淡睇齊,尤其曾經令對手聞風喪膽奧脫福球場,今季冇晒主場威力,繼輸畀熱刺同遭聯賽新軍狼隊逼和之後,早前英聯盃90分鐘法定時間內主場仲同打吡郡打到難分難解,最終12碼更不敵呢支英冠對手遭淘汰,近3仗主場未贏過。踢到咁球迷肯定唔收貨,除咗寸王首當其衝受批評之外,陣中唔少主力其實都要孭鑊,尤其中場核心保羅普巴身為隊中天價球員之一,表現同薪酬完全唔成正比,演出時好時壞,呢位法國球星如果唔改變過分個人化嘅踢法,面對歐聯強敵隨時累全家。

紅魔歐戰主場忌西甲
華倫西亞今季開局雖然較慢熱,不過上仗作客擊敗皇家蘇斯達,狀態回勇,尤其今季成功留住洛迪高摩連奴同干度比亞等猛將,又成功買斷攻擊好手干卡路古亞迪斯嘅合約,呢位葡萄牙新星擅長邊路發難,有力靠側擊威脅曼聯防線。況且曼聯過往歐戰對親西甲球隊都唔算出色,主場出擊往往都冇乜優勢,近7次歐戰主場面對西甲對手只取1勝3和3負。蝙蝠軍團只要好好向近期作客成功挑戰紅魔嘅球隊取經,想揾出曼聯嘅弱點唔係難事,睇好佢哋成功搶分,讓球客勝捧得過。

www.city008.com
上一篇:「熱曼戰」主宰莫連奴前途下一篇:没有了
返回首页 | 关于我们 | 版权所有 | 免责申明 | 广告联系 | 网站建设 | 网站地图 | 赛事分析 | 体城心水 | 会员中心 | 足球比分 | 足球指数 |
Copyright © 2007 - 2017 体城网 Inc. All Rights Reserved. | E-Mail:1394124893@qq.com | 沪ICP备15001284号-1